Yr wythnos diwethaf (26-30 Ebrill), cymerodd dros 2,000 o ddisgyblion o 50 o ysgolion cynradd ran yn ein digwyddiad rhithiol mwyaf erioed.
Ymunodd Eco-Sgolion ar draws Cymru â chyfres o weithdai a heriau newid hinsawdd ar-lein. Bob dydd, dysgodd y disgyblion am agweddau gwahanol ar yr argyfwng newid hinsawdd byd-eang, yn cynnwys pwysigrwydd diogelu coedwigoedd a’r cynnydd mewn ffasiwn cyflym.
Meddyliwyd am atebion creadigol a rhai enillion hawdd ar gyfer lleihau ein hôl troed carbon, o brynu a defnyddio llai i ddefnyddio mathau mwy cynaliadwy o drafnidiaeth. Maent hefyd wedi cael eu hysbrydoli i gymryd rhan mewn atebion yn seiliedig ar natur, yn cynnwys plannu coed, cefnogi prosiectau plannu morwellt ac adfer mawn.
Roedd y neges gan bob ysgol yn glir – mae’n rhaid i ni weithredu nawr i ddiogelu ein hamgylchedd ar gyfer y dyfodol. Dywedodd Isaac, disgybl Blwyddyn 4 o Ysgol Gynradd Gymunedol Crugywel:
Mae’r holl newid amgylcheddol yn ofnadwy ond gyda’n gilydd, os byddwn yn gweithio’n galed, gallwn ei atal.
Isaac Disgybl Blwyddyn 4 o Ysgol Gynradd Gymunedol Crugywel
Roedd yn wych gweld cymaint o Eco-Sgolion yn cymryd rhan yn ein gweithdai newid hinsawdd; yn rhannu syniadau creadigol ynghylch sut i greu byd cydnerth, mwy cynaliadwy. Er bod disgyblion wedi wynebu cyfnod anodd dros y flwyddyn ddiwethaf, roedd yn amlwg nad yw eu hymrwymiad i fynd i’r afael â’r newid yn yr hinsawdd wedi arafu. Mae angen i ni i gyd ddilyn eu harweiniad a gweithredu nawr i ddiogelu ein hamgylchedd ar gyfer cenedlaethau’r dyfodol.
Lesley Jones Prif Weithredwr Cadwch Gymru’n Daclus
Ariennir rhaglen Eco-Sgolion yng Nghymru gan Lywodraeth Cymru.
