Ardaloedd Di-Sbwriel

Mae Ardal Ddi-sbwriel yn ardal ddynodedig y mae busnes, ysgol neu sefydliad yn gwneud addewid i’w chadw’n lân trwy godi sbwriel yn rheolaidd.

Gall yr ardaloedd fod o unrhyw faint. Mae rhai sefydliadau yn mabwysiadu ardaloedd bach o amgylch eu heiddo, tra bod eraill yn mabwysiadu mannau gwyrdd mwy, llwybrau troed neu ystadau diwydiannol.

Gall busnesau hefyd ymuno ac ymrwymo i ofalu am ardal fwy gyda’i gilydd.

Byddwn yn eich helpu chi i ddewis ardal sydd yn addas ar gyfer eich gallu.

Mae’r rhan fwyaf o sefydliadau yn codi sbwriel unwaith y mis, ond mae croeso i chi wneud mwy os gallwch. Y peth pwysicaf yw cysondeb.

Trwy ddod yn Ardal Ddi-sbwriel, rydych yn cytuno i gofnodi eich gweithgareddau gan ddefnyddio ein system hawdd i’w defnyddio, sef eCyfrif Cymru.

Mae’n cymryd munudau yn unig i gyflwyno adroddiad, ond mae pob ychwanegiad yn gwneud gwahaniaeth mawr. Mae eich data yn ein helpu ni i ddatblygu darlun cliriach o’r heriau y mae eich cymunedau’n eu hwynebu ac mae’n pwysleisio’r effaith anhygoel y mae gwirfoddolwyr yn ei chael ledled Cymru.

Os oes gennych offer codi sbwriel yn barod, gwych. Os na, gallwch fenthyg offer am ddim o’ch Hyb Codi Sbwriel agosaf.

Mae gennym hefyd amrywiaeth o offer fforddiadwy i’w brynu yn ein siop.

• Gall codi sbwriel drawsnewid ardal yn gyflym, o un sy’n edrych fel ardal wedi ei hesgeuluso i ardal y gall pobl ymfalchïo ynddi.
• Mae mabwysiadu Ardal Ddi-sbwriel yn dangos eich bod yn sefydliad cyfrifol sy’n cymryd taflu sbwriel o ddifrif. Byddwn yn rhoi adnoddau i chi i’ch helpu i gyhoeddi eich statws fel Ardal Ddi-sbwriel.
• Mae wedi cael ei brofi bod rhoi cyfle i staff wirfoddoli yn gwella cynhyrchiant, morâl, a chyfraddau cadw.
• Mae cymryd rhan mewn prosiectau y tu allan i’r swyddfa neu’r ysgol yn rhoi cyfle i bobl gysylltu â’i gilydd ar lefel hollol wahanol.

Os hoffech fabwysiadu Ardal Ddi-sbwriel, e-bostiwch info@keepwalestidy.cymru.

Bydd eich swyddog prosiect lleol yn cysylltu i drafod y camau nesaf gyda chi.