Daeth dros 320 o ddisgyblion ysgol i COP Ieuenctid Cymru eleni.
Wedi’i drefnu gan Maint Cymru a Cadwch Gymru’n Daclus, tynnodd y digwyddiad sylw at sut y gall cenhedloedd bach – fel Cymru – wneud cyfraniad enfawr tuag at y frwydr am ddyfodol cynaliadwy.
Cafodd mynychwyr gyfle i ddysgu gan arweinwyr brodorol o Genedl Wampís yn yr Amazon Periw, a rannodd eu profiadau a’u mewnwelediadau o ddiogelu un o ecosystemau mwyaf hanfodol y byd.
Yn ogystal â’r persbectif byd-eang hwn, roedd COP Ieuenctid Cymru yn cynnwys cyfres o weithdai a thrafodaethau difyr gydag arbenigwyr o Eco-Sgolion Cymru. Cafodd pobl ifanc gyfle i archwilio materion hinsawdd dybryd, gan gynnwys effaith dewisiadau bwyd, pwysigrwydd lleihau gwastraff bwyd gan flaenoriaethu cynaliadwyedd.
Mae COP Ieuenctid Cymru yn ddigwyddiad hanfodol ar gyfer meithrin y genhedlaeth nesaf o arweinwyr amgylcheddol. Trwy ddarparu llwyfan i bobl ifanc gysylltu ag arweinwyr brodorol, cydweithio â chyfoedion, a datblygu eu sgiliau, rydym yn eu grymuso i ysgogi newid cadarnhaol yn eu cymunedau a’r tu hwnt.
Owen Derbyshire Prif Weithredwr Cadwch Gymru'n Daclus
Efallai ein bod ni'n genedl fach, ond mae gennym ni lais mawr a phobl ifanc anhygoel. Gallwn wneud gwahaniaeth.
Rhannodd myfyrwyr o Ysgol Gyfun Sir Fynwy, sydd wedi bod yn gweithio i ddylunio bwydlen ysgol ddi-ddatgoedwigo, eu taith ysbrydoledig. Esboniodd ddau ddisgybl sut y cawsant eu hysbrydoli i weithredu er budd yr amgylchedd ac roeddent yn cydnabod yr effaith enfawr y mae dewisiadau bwyd yn ei chael ar y blaned. Mae’r korma ffacbys wedi’i brofi’n boblogaidd ar eu bwydlen ginio ac yn cael ei fwynhau gan staff a myfyrwyr bob wythnos. Dangosodd eu hymrwymiad i ddewisiadau bwyd cynaliadwy sut y gall gweithredu lleol gyfrannu at ymdrechion byd-eang i fynd i’r afael â newid hinsawdd.
Cafodd y digwyddiad ei drefnu i gyd-fynd ag Wythnos Hinsawdd Cymru a COP29 y Cenhedloedd Unedig yn Azerbaijan (11-22 Tachwedd). Roedd Aelodau’r Senedd yn cefnogi’r digwyddiadau. Yng Nghaerdydd, daeth y Dirprwy Brif Weinidog a’r Gweinidog Newid Hinsawdd a Materion Gwledig Huw Irranca-Davies yn annerch y bobl ifanc. Tynnodd sylw at ymrwymiad Llywodraeth Cymru i ddyfodol cynaliadwy ac fe wnaeth annog pobl ifanc i barhau â’u hymdrechion. Daeth Rhun ap Iorwerth i Wrecsam hefyd a gyflwynodd araith rymusol ac atebodd gwestiynau heriol gan y disgyblion.
Ydych chi’n awyddus i ysbrydoli eich myfyrwyr? Edrychwch ar ein digwyddiadau Eco-Sgolion
