Pa mor lân yw ein strydoedd yng Nghymru?

Rydym wedi cyhoeddi ein hadroddiad blynyddol annibynnol diweddaraf ar lendid strydoedd yng Nghymru. Rydym yn arolygu miloedd o strydoedd ym mhob cwr o’r wlad ac wedi bod yn gwneud hynny ers 2007.

Os ydych yn chwilio am y data sbwriel stryd mwyaf diweddar a dibynadwy ar gyfer Cymru, rydych yn y lle iawn! Rydym yn creu’r unig fesur cyson a chadarn o ddata sbwriel stryd ar gyfer Cymru gyfan.

Mae ein hadroddiad unigryw wedi datgelu bod sbwriel smygu wedi cael ei ganfod ar dair o bob pedair stryd ar draws y wlad yn 2022-23. Er gwaethaf gwelliannau sylweddol mewn sbwriel yn ymwneud â smygu ers i arolygon ddechrau, canfuwyd bonion sigaréts, e-sigaréts, pecynnau a blaen hidlwyr ar 76% o strydoedd eleni. E-sigaréts untro yw’r bwgan newydd a enwir am y tro cyntaf yn adroddiad eleni.

Mae ‘Pa Mor Lân Yw Ein Strydoedd?’ yn dod â chanlyniadau ynghyd o filoedd o arolygon glendid strydoedd i roi ‘cipolwg’ ar faterion sbwriel ac ansawdd amgylcheddol eraill.

Felly, pa mor lân yw ein strydoedd?

Mae prif ganlyniadau adroddiad Pa Mor Lân Yw Ein Strydoedd? yn cynnwys y canlynol:

Mae 96% o strydoedd ar Radd B ac yn uwch. Mae Gradd B ac yn uwch yn golygu bod gan y strydoedd lefel dderbyniol o lendid.
Cofnodwyd baw cŵn ar 6% o strydoedd – y ffigur isaf ers i arolygon glendid strydoedd ddechrau yn 2007-08.
Sbwriel sydd yn cael ei ollwng gan gerddwyr yw’r ffynhonnell fwyaf cyffredin o hyd.
Canfuwyd pecynnau bwyd a diod wrth fynd ar 65% o strydoedd.
Sbwriel smygu yw’r math mwyaf cyffredin o sbwriel, wedi ei ganfod ar dair o bob pedair stryd. Nodwyd tuedd newydd – mae amcangyfrifon cynnar yn awgrymu bod e-sigaréts wedi eu canfod ar 6% o strydoedd.
Roedd 7,450 o weipiau gwlyb wedi eu taflu ar strydoedd yng Nghymru ar unrhyw un adeg.

Darllenwch ein hadroddiad ‘Pa Mor Lân Yw Ein Strydoedd? 2022-23’ a methodoleg yr arolwg.