Digwyddiad Codi Sbwriel Diwrnod y Ddaear yn Ysgol Maes Owen

Dywedwch wrthym am eich prosiect:

Nod ein digwyddiad codi sbwriel ysgol gyfan oedd gwella tiroedd ein hysgol a’r ardal leol, gan annog dysgwyr i ymfalchïo yn eu hamgylchedd a chodi ymwybyddiaeth o sbwriel, cynaliadwyedd a’r effaith y gall ein gweithredodd bob dydd eu cael.

Beth wnaethoch chi a sut wnaethoch chi gynnwys yr ysgol gyfan?:

Gan ddefnyddio offer o Hwb Codi Sbwriel Dyfodol Disglair yn Rhyl, cymerodd pob dosbarth ran mewn digwyddiad codi sbwriel o gwmpas tiroedd yr ysgol a strydoedd cyfagos. Gweithiodd dysgwyr mewn grwpiau ochr yn ochr â staff, gan ddefnyddio menig a chodwyr sbwriel i gasglu a didoli sbwriel yn ddiogel. Rhoddodd hyn gyfle i bawb yn yr ysgol chwarae rôl weithredol a gwneud gwahaniaeth cadarnhaol i’r amgylchedd o’u cwmpas.

Sut a phryd gwnaethoch chi benderfynu ar y targed hwn?:

Roedden ni wedi sylwi ar gynnydd yn y sbwriel ar lawr o gwmpas yr ysgol a theimlon ni bod angen i ni weithredu. Trafododd dysgwyr faterion amgylcheddol a rhannodd eu syniadau ynghylch sut y gallem wneud gwahaniaeth. Gyda’n gilydd, dewison nhw ddigwyddiad codi sbwriel  fel ffordd ymarferol a chyflawnadwy  o weithredu a gwneud gwelliannau gweladwy ar unwaith i’n hamgylchedd.

Sut mae’r prosiect wedi effeithio ar eich ysgol a’ch cymuned?:

Mae’r ardal o gwmpas ein hysgol bellach yn llawer glanach ac yn fwy diogel, ac mae’r prosiect wedi gwneud dysgwyr yn llawer mwy ymwybodol o faint o sbwriel sydd i’w gael yn ein hamgylchedd lleol yn ogystal â’r amrywiaeth o fathau o sbwriel sydd yno. Cafodd y dysgwyr sioc wrth weld rhai o’r eitemau, gan gynnwys sedd toiled, a darn mawr o ddeunydd insiwleiddio! Mae’r profiad wedi eu hannog i feddwl yn fwy gofalus am sbwriel a chanlyniadau gadael sbwriel ar ein holau.

Sut wnaethoch chi ddathlu llwyddiant a beth yw eich camau nesaf?:

Rhannon ni luniau o’r digwyddiad codi sbwriel yn ystod gwasanaethau a gwnaethom ddathlu a chanmol ymdrechion yr holl ddysgwyr a gymerodd ran. Yn ogystal, gwnaethon ni greu graffiau i gofnodi ac archwilio’r sbwriel roedden ni wedi’i gasglu a arweiniodd at ddarganfyddiad arbennig o gofiadwy; casglon ni yr un faint o bwysau mewn sbwriel ag y mae pengwin brenhinol yn ei bwyso!

Ein camau nesaf yw adeiladu ar lwyddiant y prosiect trwy drefnu digwyddiadau codi sbwriel rheolaidd, cyflwyno monitorau eco ym mhob dosbarth ac ymgorffori mwy o wersi a gweithgareddau o amgylch lleihau gwastraff ac ailgylchu.

A oes unrhyw beth arall yr hoffech chi rannu am y prosiect hwn?:

Roedd y prosiect wedi cryfhau gwaith tîm a rhoddodd gyfle go iawn i ddysgwyr fynegi eu barn a chymryd camau ar fater sy’n bwysig iddyn nhw. Mae wedi helpu’r dysgwyr i ddeall y gall camau bach wneud gwahaniaeth mawr, gan eu hannog i gymryd mwy o gyfrifoldeb am yr amgylchedd sydd o’u cwmpas. Yn bwysicach fyth, mae’r prosiect wedi helpu i ddatblygu synnwyr o falchder a gofal am ein hamgylchedd lleol yr ydym yn gobeithio y bydd y dysgwyr yn cario gyda nhw y tu hwnt i gatiau’r ysgol.