Parciau Cymru’n cael eu cydnabod fel y ‘gorau o’r goreuon’

Eleni, mae llwyddiant y Faner Werdd wedi parhau gyda Gwobrau y Gorau o’r Goreuon a Dewis y Bobl 2024.

Mae pum cynllun o Gymru wedi ennill teitlau y Gorau o’r Goreuon mewn seremoni wobrwyo rithiol ar draws y DU ar 14 Tachwedd.

Mae’r anrhydeddau yn gwobrwyo staff, gwirfoddolwyr a phrosiectau sydd wedi gwneud gwahaniaeth gwirioneddol i rai o 2,227 o safleoedd Baner Werdd y DU.

Cafodd Rhandiroedd Ward Van yng Nghaerffili eu cydnabod am eu hymdrechion i gynyddu ‘Defnydd gan Ferched a Menywod’.

Mae ymchwil yn dangos bod menywod a merched yn llai tebygol o ddefnyddio mannau cyhoeddus yn bennaf oherwydd pryderon am ddiogelwch, sy’n effeithio ar eu hiechyd a’u lles..

Dros y ddwy flynedd diwethaf, mae gwirfoddolwyr o Randiroedd Ward Van wedi ei wneud yn genhadaeth i annog mwy o fenywod a merched i fwynhau eu man gwyrdd. Maent wedi creu ardaloedd tyfu llai, mwy hygyrch, wedi datblygu ‘man croeso’ wythnosol i fynd i’r afael ag unigrwydd a thlodi bwyd, ac wedi sefydlu grŵp cerdded i hybu lles pobl. O ganlyniad, mae’r aelodaeth wedi cynyddu 300%.

Enillwyr eraill y ‘Gorau o’r Goreuon’ oedd:

Prosiect Treftadaeth – Coed Dyffryn Penlle’r-gaer, Abertawe
Gweithiwr y Flwyddyn – Theresa Heal, Rhandir Fferm Ynys Hywel, Caerffili
Tîm Gwirfoddoli y Flwyddyn (Cymru) – Cyfeillion Wern Mynach, Gwynedd
Gwirfoddolwyr Ifanc – Gwirfoddolwyr Dug Caeredin Coed Maes Y Pant, Wrecsam

Ni ddylid byth cymryd mynediad i barciau a mannau gwyrdd o ansawdd uchel, sydd am ddim, yn ganiataol. Rydym i gyd yn gallu mwynhau’r mannau hyfryd hyn oherwydd ymroddiad staff a gwirfoddolwyr ledled Cymru. Mae gwobrau’r Gorau o’r Goreuon yn rhoi sylw i rai o’r prosiectau anhygoel sy’n digwydd ar safleoedd y Faner Werdd. Hoffem longyfarch ein henillwyr haeddiannol ar eu cyflawniad rhagorol.

Lucy Prisk
Cydlynydd y Faner Werdd

Safleoedd Cymru ymysg deg uchaf y DU

Cafwyd mwy o newyddion da wedyn, trwy gyhoeddi 10 Uchaf Dewis y Bobl.

Pleidleisiodd dros 21,000 o aelodau’r cyhoedd gan enwi Parc Gwledig Margam a Gardd Enfys ymysg y deg man gwyrdd gorau yn y DU.

Dyma’r unfed flwyddyn ar ddeg i Barc Gwledig Margam yng Nghastell-nedd Port Talbot gael ei goroni’n enillydd Dewis y Bobl – cyflawniad gwirioneddol anhygoel.

Yn y cyfamser, mae Gardd Enfys yng Ngheredigion wedi mynd yn syth i’r deg uchaf ar ôl cyflawni Gwobr Gymunedol y Faner Werdd am y tro cyntaf ym mis Gorffennaf!

Ymweld â’ch safle Baner Werdd lleol

Ble bynnag y gwelwch Faner Werdd yn chwifio, byddwch yn gwybod eich bod yn ymweld â lle rhagorol gyda’r safonau uchaf.

Rydym yn cynnal y cynllun yng Nghymru gyda chymorth gan Lywodraeth Cymru.

Mae 291 o safleoedd y Faner Werdd ar draws y wlad – dewch o hyd i’ch un agosaf trwy fynd i’n map.

> Mynd i’r map

Ymuno â theulu y Faner Werdd 

Ydych chi’n gofalu am barc neu fan gwyrdd o ansawdd gwych? A yw eich grŵp neu eich tîm yn haeddu cydnabyddiaeth ryngwladol? Gallwch wneud cais nawr am Wobr y Faner Werdd neu Gwobr Gymunedol y Faner Werdd!

I ganfod mwy a gwneud cais, ewch i’n tudalennau Baner Werdd ar gyfer Parciau

(Mae’r ceisiadau’n cau ar ddiwedd Ionawr)