Seilwaith cyhoeddus

Nid yw’r ffordd rydym yn dylunio ein mannau cyhoeddus yn ymwneud ag estheteg yn unig.

Yn yr un ffordd ag y gall creu llwybrau cerdded a beicio yn ein dinasoedd effeithio ar ymddygiad trafnidiaeth a chymudo pobl, gallwn hefyd ‘ddylunio’ mannau mwy diogel a gofalgar sy’n effeithio ar y duedd i daflu sbwriel a throseddau eraill.

Deall y broblem

Mae mannau cyhoeddus yn aml yn llawn pethau fel biniau, goleuadau stryd, bocsys postio, blychau plannu, meinciau a llochesi bws. Yn anffodus, yn aml gall y nodweddion hyn fod yn ganolbwynt ymddygiad gwrthgymdeithasol, taflu sbwriel, graffiti a fandaliaeth a gall eu harwynebau fod yn anodd eu glanhau.

Gall gwrthrychau sydd wedi’u cynllunio’n wael neu sydd wedi’u lleoli’n amhriodol ddal sbwriel ac mae rhannau diarffordd ac esgeulus o fannau cyhoeddus yn debygol o ddenu mwy o ymddygiad gwrthgymdeithasol.

Mynd i'r afael â'r broblem

Mae llawer o wahanol fathau o finiau ledled Cymru i’n helpu i gadw ein cymunedau’n lân. Mae prinder biniau yn aml yn cael ei ddefnyddio fel esgus i daflu sbwriel, ond nid yw biniau ar eu pen eu hunain yn datrys problem sbwriel.

Yn anffodus, mae biniau yn ddrud felly mae’n amhosibl eu darparu ym mhob man. Os nad oes biniau o gwmpas, mae angen i ni fynd â’n sbwriel a’n baw cŵn gartref gyda ni i gadw ein cymunedau’n lân.

I fod yn effeithiol, mae angen cynnal a chadw a gwacáu biniau’n rheolaidd. Mae Cadwch Gymru’n Daclus yn cydnabod pwysigrwydd biniau i atal sbwriel, ac rydym yn credu y gall y bin cywir yn y lle cywir gael effaith fawr.