Cyflwyno ein hymgyrch sbwriel: Creu Straeon, Nid Sbwriel

Wrth i’r haf sefydlu ei hun ac wrth i bobl fynd i draethau, parciau a mannau hardd trawiadol Cymru, rydym yn annog pawb i greu straeon, nid sbwriel.

Mae sbwriel yn parhau i fod yn bla mewn cymunedau, yn bygwth bywyd gwyllt ac yn niweidio ein hamgylchedd naturiol gwerthfawr. Mae ffigurau diweddar yn datgelu bod pecynnau bwyd brys wedi eu canfod ar 26.4% o strydoedd a sbwriel diodydd ar 43.6% – arwydd clir bod diwylliant o daflu i ffwrdd yn cael effaith niweidiol ar bob cwr o Gymru. P’un ai eich bod yn mynd i’r arfordir i nofio, yn mwynhau cerdded yng nghefn gwlad, neu’n dal yr haul yn eich parc lleol, mae’r neges yn syml: os ydych chi’n dod ag ef gyda chi, ewch ag ef gartref.

“Mae ein parciau, ein traethau a’n mannau gwyrdd yn ganolog i’r hyn sy’n gwneud Cymru mor arbennig. Mae gennym i gyd ran i’w chwarae yn gofalu amdanynt. “Mae’n syml: os ydych chi’n dod ag ef gyda chi, ewch ag ef gartref. Dewch i ni fwynhau popeth sydd gan Gymru i’w gynnig yr haf hwn, heb ddifetha’r profiad i eraill neu niweidio’r amgylchedd. Dewch i ni greu straeon, nid sbwriel.”

Owen Derbyshire
Prif Weithreddwr Cadwch Gymru’n Daclus

Yn newydd ar gyfer 2025, mae Cadwch Gymru’n Daclus yn uno gyda chrewyr cynnwys lleol ledled Cymru, i helpu i roi’r gair ar led i gynulleidfaoedd newydd ar y cyfryngau cymdeithasol.

Mae’r ecolegydd a’r crëwr cynnwys Joe Wilkins o Geredigion yn cefnogi’r ymgyrch fel rhan o’i gyfres ‘Sandwich with a View’.

“Fel rhywun sy’n caru Cymru ac yn annog pobl i archwilio ein gwlad hyfryd yn gyfrifol, rwy’n gwybod pa mor hanfodol ydyw ein bod yn cadw’r mannau arbennig hyn yn ddi-sbwriel. Mae natur yng Nghymru o dan bwysau llawer o fygythiadau y tu hwnt i’n rheolaeth, ond mae mynd â’n sbwriel gartref yn un peth syml y gallwn ni i gyd ei wneud i helpu bywyd gwyllt i adfer a ffynnu. Dewch i ni greu straeon, nid sbwriel.”

Joe Wilkins
Crëwr Cynnwys

Sut gallwch chi gymryd rhan

Gall pawb chwarae rhan yn diogelu mannau hardd Cymru yr haf hwn. Dyma sut gallwch chi gymryd rhan:

Ewch â’ch sbwriel gartref – Pan fydd biniau’n llawn neu ddim ar gael, y peth gorau y gallwch chi ei wneud yw mynd â’ch sbwriel gyda chi a gadael dim olion ar ôl.
Tagiwch ni yn eich anturiaethau – Rhannwch eich lluniau wrth i ni archwilio parciau, traethau a mannau gwyrdd anhygoel Cymru. Tagiwch @KeepWalesTidy ar y cyfryngau cymdeithasol.
Defnyddiwch yr hashnodau – Ymunwch â’r sgwrs trwy ddefnyddio #CreuStraeonNidSbwriel neu #CreuStraeon wrth bostio.
Helpwch i hyrwyddo’r ymgyrch – Eisiau gwneud mwy? Ewch i’n Brandbag i lawrlwytho deunyddiau ymgyrch am ddim, yn cynnwys posteri a graffeg y cyfryngau cymdeithasol. Gallwch ymweld â’n pecyn cymorth brand am fwy o wybodaeth a syniadau am negeseuon.

Wedi ei ariannu gan Lywodraeth Cymru, nod yr ymgyrch yw ennyn ymdeimlad o falchder a chyfrifoldeb ar y cyd ledled Cymru – gan brofi y gall hyd yn oed newidiadau bach mewn ymddygiad wneud gwahaniaeth mawr i’r mannau rydym yn eu caru a’u rhannu.

Yn ôl at ein newyddion